Un Paso Máis culmina su 'Obradoiro de Verán' con una gran fiesta
Este venres poñeranlle o broche de ouro a un verán único, cheo de aprendizaxes, diversión e amizade no Obradoiro de Verán de Un Paso Máis. Logo de dous meses intensos, educativos, deportivos, sociais e terapéuticos, chega o momento de despedirse, pero dende a entidade queren facelo dunha maneira moi especial: cunha xornada chea de animación e inchables para premiar a todos e todas as nenas que os acompañaron tanto en xullo coma en agosto.
O horario habitual do obradoiro mantense de 09:30 a 13:30, pero a animación co inchable estará dispoñible entre as 10:00 e as 13:00 horas, para non alterar a rutina dos nenos e nenas, respectando os seus tempos e necesidades.
«Foron semanas nas que rimos, xogamos, descubrimos e, sobre todo, medramos xuntos. Este obradoiro non só foi unha actividade para ocupar o tempo libre no verán: foi un espazo de convivencia, de aprendizaxe e de ilusión. Aquí aprendemos a compartir, a agardar a quenda, a probar sabores novos, a dicirlle adeus ao chupete, a gozar coa compañía dos demais e, por suposto, a xogar moito. Tamén demos os primeiros pasos nalgúns deportes, descubrimos que somos capaces de moito máis do que pensabamos e fixemos amizades que, estamos seguros, durarán no tempo», afirman dende Un Paso Máis.
Este verán tamén tivo un valor engadido moi especial: para moitos nenos e nenas foi a primeira vez que puideron participar nunha actividade destas características. E non só iso: para moitas familias significou poder conciliar por primeira vez durante o verán. A realidade é que a maioría dos participantes nunca tiveran a oportunidade de gozar deste tipo de experiencias, ben pola falta de oferta adaptada, ben porque noutros espazos non foran aceptados ou, no caso de selo, se viran obrigados a abandonalos aos poucos días, xa fose por ser expulsados ou por recibir a invitación de marchar ante a imposibilidade de seren atendidos ou vixiados correctamente. Este obradoiro quixo romper con esa realidade, ofrecendo un espazo inclusivo, seguro e pensado para todos.
Queren facer unha mención moi especial á Clínica de Isabel García que, coa súa titular á cabeza, presentou un equipo de auténticas profesionais cun nivel altísimo de compromiso e unha compenetración admirable cos nenos e nenas. O seu traballo, entrega e dedicación foron fundamentais para que esta experiencia fose un éxito rotundo.
O que comezou como unha iniciativa na que depositaron moitas esperanzas acabou superando con creces as súas expectativas máis optimistas. A implicación das familias, o entusiasmo dos nenos e nenas e a ilusión do seu equipo fixeron posible que este verán sexa xa inesquecible. Por iso, nesta última xornada, queren facer algo á altura de todo o vivido: unha gran festa na que reine a alegría, con xogos, música e inchables que farán as delicias dos máis pequenos.
«Dende Un Paso Máis queremos dar as grazas a todas as persoas que fixeron posible esta aventura: ás familias pola súa confianza, ao noso equipo polo esforzo e dedicación, e por suposto aos grandes protagonistas, os nenos e nenas, por enchernos cada día de enerxía e sorrisos», conclúen.
Este venres non será só unha despedida, senón unha celebración: a celebración dun verán cheo de experiencias, aprendizaxes e momentos que quedarán na memoria. «Porque o obradoiro remata, pero todo o que vivimos xuntos seguirá acompañándonos».
FONTE DA NOTICIA: NH Diario