Un Paso Máis pasa un día en familia nas Illas Cíes da man da Asociación Galega de Familias Numerosas

O pasado sábado 12 de xullo, as familias de Un Paso Máis, procedentes dos concellos de Carballo, Coristanco, A Laracha e Ponteceso, viviron unha xornada intensa, divertida e chea de emocións nas Illas Cíes. Foi unha saída perfectamente organizada pola Asociación Galega de Familias Numerosas (AGAFAN), que lles permitiu gozar dun día extraordinario neste auténtico paraíso natural.

Nada máis chegar, puxéronse en modo vacacións: mergullándose na famosa Praia de Rodas, percorreron as rutas da illa acompañados por guías locais e desfrutaron dun feixe de actividades lúdicas na praia, pensadas para todas as idades.

Os traxectos en barco coas embarcacións de Piratas de Nabia foron especialmente celebrados polos máis pequenos, sobre todo para aqueles que vivían o seu bautismo no mar. As súas caras de emoción e ilusión fixeron que o propio traxecto fora unha aventura máis dentro desta experiencia tan completa.

Desde Un Paso Máis puxeron á disposición das familias o transporte por estrada, para que a diversión comezase xa no autobús, desde a saída da Escola de Arrabaldes de carballo ás 8 da mañá. Risas e moitas ganas de pasalo ben fixeron que o traxecto fora o preludio perfecto do día que lles agardaba.

Foi unha xornada que combinou deporte, natureza, inclusión, tempo en familia e ese necesario respiro que tanto agradecen as familias, que o cualifican coma un auténtico éxito. Tanto é así que, como soe acontecer, no camiño de volta xa comezaban a xurdir ideas e propostas para a próxima saída.

Un Paso Máis agradece a todas as familias a súa alegría, a AGAFAN a organización e a Piratas de Nabia por facer que a viaxe fose tamén parte da aventura, para seguir sumando pasos… e momentos inesquecibles.