Xadrez adaptado e inclusivo
A sede da entidade ASPABER acolleu este xoves unha xornada diferente marcada pola estratexia e a convivencia. A Agrupación Deportiva Un Paso Máis visitou as instalacións co seu taller de xadrez adaptado e inclusivo, unha iniciativa que busca romper barreiras a través do taboleiro.
Nesta sesión participaron un total de 16 usuarios e usuarias de ASPABER, que puideron gozar dunha actividade deseñada para fomentar a axilidade mental e a integración social. O taller foi impartido polos monitores Adrián Monteseirín e Valentín Costa, encargados de guiar aos asistentes durante toda a mañá deste xoves.
Unha xornada entre a historia e a práctica.
O taller desenvolveuse nun ambiente lúdico e participativo, dividido en dúas partes diferenciadas:
Divulgación e curiosidades: Nun primeiro bloque, abordáronse aspectos teóricos como a historia do xadrez, as súas múltiples utilidades pedagóxicas e outras particularidades que fan deste xogo unha ferramenta única.
Formación e xogo: Posteriormente, pasouse á parte instructiva, onde os participantes aprenderon as regras básicas e o movemento das pezas, poñendo en práctica o aprendido sobre o taboleiro.
Esta colaboración entre a AD Un Paso Máis e ASPABER reafirma o compromiso de ambas as entidades coa inclusión sociodeportiva, demostrando que o xadrez é un deporte sen límites onde a concentración e a diversión van da man.
